Hreinlegt athafnasvæði með góðri tengingu við þjónustu bæjarins einsog verslanir, hótel og veitingastaði. Hafnarvigtin, saltsala Hafnarbakka hf., vöruhús Skipaafgreiðslu Suðurnesja eru við höfnina. Keflavíkurhöfn er jafnframt tollhöfn.

Mörg skip nota Keflavíkurhöfn til farþega- og áhafnaskipta en aðeins 6 km eru á Keflavíkurflugvöll og því fáir kostir betri á landinu. Viðlegukantur fyrir skip allt að 165m með djúpristu að 7 til 13m ásamt fjölda annarra viðlegukanta fyrir smærri skip.

Njarðvíkurhöfn
Njarðvík er fisklöndunarhöfnin með Fiskmarkað Suðurnesja við Suðurgarð og eina bestu ísafgreiðslustöð við Faxaflóa á hafnarkantinum. Frysti- og kæligeymslur eru við hafnarbakkann. Skipasmíðastöð Njarðvíkur h.f. er með fjölþætta þjónustu og nýtt skipaskýli. Frábær aðstaða til viðgerða við Suðurgarð, sem er vel útbúinn rafmagnstengingum og stutt í S.N. og vélsmiðjur og aðra þjónustuaðila. Netaverkstæði Suðurnesja h.f. er í Njarðvík.

Góð gámasvæði eru við Njarðvíkurhöfn, sem nýtast jafnt far- og fiskiskipum. Innsiglingin er greiðfær með 5,6 m dýpi, sem stendur til að dýpka síðar. Viðlegukantur fyrir skip allt að 130 m löng með djúpristu að 7,5 til 9 m ásamt fjölda annarra viðlegukanta við Norður- og Suðurgarð.

Helguvíkurhöfn
Helguvík er sú höfn sem skipulögð hefur verið með framtíðarsjónarmið í huga. Mikið athafnasvæði fyrir gámageymslur, vöru- og frystigeymslur. Iðnaðarlóðir hafa verið skipulagðar í nágrenninu til að uppfylla óskir út- og innflutningsaðila um kjöraðstöðu til uppbyggingar athafnasvæða. Framtíðarhöfn fyrir þau fyrirtæki sem munu nýta sér þá miklu orku og möguleika sem Hitaveita Suðurnesja býður upp á háhitasvæðinu á Reykjanesi.

Við Helgarvíkurhöfn hefur verið skapaður grunnur að fríiðnaðarsvæði, þar sem Helguvík bíður upp á kjör tengingar á sjó, landi og í lofti með Keflavíkurflugvöll í aðeins 4 km fjarlægð. Helguvík er einnig olíuhöfn Suðurnesja með Nato olíubryggju og birgðastöð. Fiskimjölsverksmiðja SR-Mjöls h.f. og flokkunarstöð Helguvíkurmjöls h.f. eru í NV enda Helguvíkur. Auðveld innsigling með mikið dýpi. Viðlegukanturinn í Helguvík er 150m og er dýpið 10m fyrir skip allt að 200m.

Hafnir
Hafnir er í dag smábátahöfn með viðlegu fyrir 10 báta á 2m dýpi og einn löndunarkrana.

Smábátahöfnin í Gróf - Smábátahafnir
Smábátahöfnin í Gróf rúmar 82 smábáta á þremur vel útbúnum flotbryggjum með rafmagnstengingum ásamt olíuafgreiðslubryggju, upptökubraut og tveimur löndunarkrönum. Fyrsta flokks aðstaða í skjóli og skemmtilegu umhverfi, jafnt fyrir fiskibáta og skemmtibáta. Miðstöð hvalaskoðunarferða með frábæru kaffihúsi við höfnina.