   
|
|
|
|
Stofnun Árna Magnússonar Árnagarður Við Suðurgötu 101 Reykjavík |
 German  English  Danish |
|
|
ÁRNASTOFNUN Stofnun Árna Magnússonar er rannsóknastofnun innan Háskóla Íslands og geymir íslensk handrit, sem afhent voru íslensku þjóðinni á árunum 1971- 1997, eftir að hafa verið geymd í söfnum í Danmörku um þriggja alda skeið. Þessar gersemar var Íslendingum mikið í mun að endurheimta. Samkvæmt lögum frá danska þinginu, sem Hæstiréttur Danmerkur staðfesti 1971, voru Konungsbók Eddukvæða og Flateyjarbók afhent sama ár og síðan nærri 2000 handrit fram til 1997. Handritamálið og lausn þess sýnir í senn örlæti dönsku þjóðarinnar og ræktarsemi Íslendinga við menningararf sinn. Meirihluti þeirra íslensku handrita, sem Árni Magnússon (1663-1730) safnaði og fól Kaupmannahafnar- háskóla til varðveislu við andlát sitt, hefur nú verið fluttur heim. Hinn hlutinn er enn í Árnastofnun í Kaupmannahöfn. Rannsóknir Stofnunar Árna Magnússonar beinast einkum að tungu og menningu Íslands á fyrri tímum, og sérstök áhersla hefur verið lögð á vísindalegar útgáfur efnis úr handritum, bæði frá miðöldum og síðari öldum. Stofnunin safnar þjóðfræðum og varðveitir um það bil 2000 klst. á segulböndum, auk þjóðfræðaefnis í handritum. Stofnunin lítur á söfn sín sem lifandi menningararf og vill stuðla að því að þessi arfur megi lifa og bera ávöxt sem snar þáttur í íslenskri þjóðmenningu og sérstæður þáttur heimsmenningarinnar. Sýningar og útgáfur, jafnt þjóðfræðilegs- sem bókmenntalegs eðlis, og önnur kynningarstarfsemi eiga að opna fólki aðgang að menningarlegum verðmætum í vörslu stofnunarinnar. Handritasýning Árnastofnunar er til húsa í Þjóðmenningarhúsinu Hverfisgötu 15, 101 Reykjavík. Opið daglega kl. 11:00 - 17:00. Aðgangseyrir kr. 300; frítt á miðvikudögum. www.thjodmenning.is HANDRITASÝNING Á sýningu Stofnunar Árna Magnússonar eru ýmis merkustu handrit í vörslu stofnunarinnar: Konungsbók Eddukvæða með sögnum af heiðnum goðum og germönskum hetjum, Flateyjarbók, stærst og heillegust allra íslenskra handrita og auðug að efni um sögu Norðurlanda og siglingar um Norður-Atlantshaf. Meðal annarra miðaldahandrita má nefna Snorra Eddu, lagahandritið Grágás, Möðruvallabók með Íslendingasögum og Stjórn með þýðingu Gamla testamentisins. Þar eru einnig merk pappírshandrit sem sýna lifandi viðtökur bókmenntaarfsins á síðari öldum. Í fremsta sal sýningarinnar er brugðið ljósi á menningarlegt og sögulegt hlutverk íslenskra miðaldahandrita, og efnisins sem þau geyma, fram til okkar daga. Kvæðin og sögurnar eru meðal auðugustu heimilda um andlegt líf fólks í Norðurálfu fyrir kristni, uppspretta þekkingar og skemmtunar við konungshirðir og á alþýðuheimilum. Ritmenningin, sem kirkjan flutti, gerði kleift að skrá þessa þekkingu við hlið nýrrar þekkingar með skipulegum hætti. Ritaðar voru frásagnir um hvernig land var numið og féll í hlut ættum og einstaklingum, lagatextar voru skráðir og á grunni fræða sem lifað höfðu í síbreytilegri mynd á manna vörum urðu til sígild bókmenntaverk. Þessi menningararfur hafði víðtæk áhrif, m.a. á Norðurlöndum, Þýskalandi og í löndum enskumælandi þjóða. Í sérstökum sal er sýnt inn í heim bókagerðar á miðöldum, sýnd tæki og efniviður auk sýnishorna af rithöndum úr handritum frá síðari hluta 12. aldar og fram á miðja 19. öld. |
 Stríðsmenn. Upphaf Sverris sögu í Flateyjarbók, skrifuð og skreytt um 1390.  Fórn Abrahams. Skreyttur upphafsstafur í íslensku bíblíuhandriti frá því um miðja 14. öld. |
· Home · Search · About Randburg · What's New · Sign Up! ·
Copyright © randburg.is - All rights reserved.
